SuperBigStar's Xanga

一首喜歡唱，但又很難唱的

Wed, 16 Dec 2009 17:00:13 GMT

眾人湧進主的國度十架少人負，眾人爭奪主的賞賜世界有誰辭，

人雖無心走主道路仍想主祝福，人雖無心去主道路仍想主祝福。

眾人都慕得主榮耀羞辱少人要，眾人都愛同主掌權損失有誰辭？

幾乎無人因主緣故看萬事如土，幾乎無人因主緣故看萬事如土

多人都貪享主甘旨少有願禁食，多人都喜登主寶座少有願漂泊，

同祂唱詩雖然有人警醒卻不能，同祂唱詩雖然有人警醒卻不能。

眾人都想同主高貴卑賤卻都畏，當主凡事為他預備他就大讚美，

當主稍為求他一點就立發怨言，當主稍為求他一點就立發怨言。

但那誠實愛主的人禍福都不問，就是他們寶貴心血也願為主捨，

求主給我這樣心志赤忠忘生死，求主給我這樣心志赤忠忘生死。

我是頭四種人？還是第五種人？我想做第五種人，但...

當我們唱詩禱告的時候何等願說獻所有，但前面有更重的十字架有更艱難的生涯！

主呀！求你憐憫！

23屆生活營

Tue, 27 Oct 2009 01:42:09 GMT

教會搞生活營，今年23屆，原來每年都搞生活營好唔容易，細教會，百零人，人手來來去去都係個D，但係，今年生活營，好多人讚，以往生活營（我去了三屆），都好辛苦，好多活動，好多遊戲，今次，遊戲適中，活動適中，而信息，比以往強。

今年生活營，經典係半夜和牧師一席話，令我更明白講解「律法與福音」的道，也令我半夜改講章，也令我漸知，如何在經文找出「福音」的原素。

今年生活營，晚會呼召人事奉，用上「拉花炮」慶祝，牧師總在這事上加點新意思，我好認同，以往呼召，人去奉獻、事奉，總是有一總淒涼孤單既感覺，但「事奉上帝是主喜悅的事」，做乜咁愁？「拉花炮」，大家有記憶，大家都開心地去事奉。Good！

今年生活營，意外之章：第一次去camp食麥當奴，仲要半夜，營地大門關上，都有得食，麥密送，密密送，24小時麥密送，正！

多謝一班生活營的籌委，一班事奉的肢體。更多謝上帝在當中的安排。多謝主！

No eyes see but God sees

Sat, 10 Oct 2009 03:03:13 GMT

最近，許多朋友都有問題，財務上，工作上，法律上，家人健康上。

有朋友在NY失業九個月，半夜來電表達佢的憂慮，失業太久會和社會脫節，失去工作能力。

有親友為了幾百蚊，搞上法庭，打完官司後堂費分分鐘係幾萬蚊，都唔知佢點死出黎。

有團友工作不愉快，逼放無薪假之餘，又突然要北上工作，破壞一早已訂的計劃。

有同行面對經濟壓力，工作壓力，人事壓力

有同學被人「跣」

有人不在其位，仍謀其政。

有同學家中出了許多事，但仍然堅信上帝。

有人逃避，有人.......

越黎越覺得這個世界邪惡，無眼睇。

但卻是不能唔睇！超無奈！

正正如此，更要相信上帝坐著為王，統管萬有。

無力記.......

Fri, 28 Aug 2009 00:56:17 GMT

見到Mack日日出日記，真羨慕，回想我二十歲出頭既日子，真係日日寫日記，記左好多年，但年紀越大，就越少記。忙？老？多野做？但見孫寶玲牧師都是差不多日日記，有時連自己的講章都post上黎（雖然係英文，但都得益不少），他貴為神學教授都寫，點解我又唔能日日寫呢？

七月至八月尾，整整一個暑假了，其實發生都好多事，例如上次提及探望的周太，八月初已主懷安息，我媽媽因要做手術，預算不能送她，但最終都能在手術前一日參加了她的安息禮。？媽媽自己也完成了膝蓋手術，現在學習行路。

我呢.......正如msn所示，呢幾日做足十四個鐘有突，早到晚，早到晚，差不多每晚都見到的夜更守衛，心中暗問，乜你晚晚都咁夜？？？呢幾日，開會啦！有會友安息要奔走啦！團契啦！証道啦！搭車回家關心同行會友啦！其實都好多野架！

真的無力，所以成日都無力記！唔係無力做！

探病

Mon, 06 Jul 2009 15:33:24 GMT

早幾日，媽媽來電，話以前住響我地樓上的周太，入左佛教醫院的善終病房，聽完之後好震驚，因為之前無乜聽過周太有病。媽媽吩咐我，要去為周太祈禱。禱告，本來就是我的份內事。

今日去探她，她很精神，和另一個街坊一齊傾往事，不驚不覺，大家相識了四十多年，當初，大家一齊搬入觀塘安寧樓，後來我們搬過香港，但友誼永固，四十多年來，從無間斷，當；大家都在捱時，佢介紹媽媽去馬會工作。

周太話，從零歲就認識我，時間過得真快，有時我好難想，媽媽和她都後生過，廿零歲就相識，四十幾年過後，大家都頭髮白了。周太話我媽媽時常都喊，媽媽識左幾十年點會唔喊，周太又囑咐我和她大子多聯絡，其實聽這些話，很心酸的。

我臨走前為她祈禱祝福。雖然周太面對疾病，但我見佢生命中顯出平安，和盼望，感謝主！她已信了主和受洗歸入基督名下！我希望可以週三和媽媽再探她，我擔心的反而是我媽媽，這幾年，外公、大家姐，和她的好朋友們，都離她而去，我想，她心中所受的創傷和打擊不少，加上身體上她的類風濕和膝退化，令她都受盡痛苦，雖然她已信主也受了洗，其實，她從上而來所得的能力，實在不多，這多少和她性格有關，求主憐憫！阿們！

旅行日記

Mon, 22 Jun 2009 10:11:26 GMT

27/5-7/6…我和黃太去了倫敦、羅馬、威尼斯和米蘭旅行，以下是旅行日記。幾長。

27 May 2009

搭00:35晚機英航出發到英國的倫敦, 因為可以online booking, 所以可以book 到最後的兩個連位, 不用和別人一同坐. 十三個鐘的航程都好快就過去了.

去到倫敦希斯路機場, 因為還很早的緣故, 而且我在機上因為太拋所以無胃口食嘢, 去到機場見到有都甩, 所以立刻去食, 一坐在餐廳就兩個鐘. 然後在機場看到有London Pass和觀光巴士, 所以就買了, 一買就買了三天的London pass和兩天的觀光巴士. 而且還買了一天去牛津劍橋的觀光團. 唉, 就係咁我和黃生為了用盡這些旅遊pass就要費心思了. 以上全部旅遊pass + 牛津劍橋的觀光團總共成為256英鎊. 酒店交通都算十分方便, 在車站及Metro旁, 而且觀光巴士站也在酒店前, 我們去酒店放好我們的行李後就立刻坐觀光巴士遊玩. 但因為當天的天氣差, 又下雨又冷, 所以第一程我們還是坐在下程, 而且可能是觀光巴士, 巴士行得十分慢, 我們希望可以玩好多嘢, 但因為這巴士行得太慢, 所以就唯有放棄.

當日我們去了玩London Eye, 不包在London Pass內, 要每人17鎊入場費, 而且又下雨, 不過去到倫敦唔玩又好似唔係唔好, 所以就上了一個好大的摩天倫, 坐了都應該有十五分鐘. 然後我們就坐觀光船 (因為天雨關係, 所以就只坐下層) 至Tower Bridge, 遊了Tower of London (這是一座城堡) 和Tower Bridge, 在Tower Bridge, 我們就行了超過八層高, 行到氣來氣喘, 由一端行到另一端就遊完了, 好彩都包在London Pass 內. 因為當天有歐聯所以我們就要趕回酒店睇比賽.

回到酒店, 才發現我們需要拿著行李爬三樓 (話三層但確實了六層)才回到房, 回到房我們一放低行李, 就出去找餐廳可以食飯及看比賽, 最後找到一間都幾靜的地方, 在酒店對面, 就在那裏食飯及看比賽, 不過那裏的食物就… 不敢恭維,尤其是我所點的雞, 簡直是煲湯後的湯渣雞, “鞋”到食唔落. 但埋單卻是45鎊.

還未看完比賽, 我就累到在餐廳差不多睡著了…

28 May 2009

因為我們的酒店在Hyde Park附近, 所以我們就去了那裏行, 那裏有記念Diana的水泉, 又有Kensington Palace, 我們用了我們的London Pass去參觀了.

然後我們買了Metro 的一天車飛, 去了黃生最夢想到的地方 – London Pass包可以參觀的車路士球場 (車路士雖然不是黃生心水球隊, 但有得去參觀球場, 佢已經開心到暈了) 我們當天帶了斑仔去, 佢最喜歡就是有醜樣球員的車路士球隊, 其中一幕就是在記者發佈會的枱上, 黃生扮經理人簽了斑仔做車路士後備球員, 佢現在還以為自已是已經簽了車路士呢!

睇完車路士球場, 我們又去了黃生最喜歡的貝爾法斯特巡洋艦參觀, 當時, 我已經很累, 所以叫黃生自己遊覽, 我在艦上甲板坐下等他. 最後我們就去了Soho 區找一個雜誌介紹的餐廳食飯, 嘩, 真係好… 難食, 英國真的無咩好食…

29 May 2009

第三天, 我們就坐了觀光巴士, Join了一個Royal London Walk, 一個導遊介紹了一些皇室的歷史, 然後帶了我們去看御林軍換班. 看完換班我們就坐多一次觀光船, 今次天氣好好, 所以可以坐上層, 聽船上導遊的介紹. 到Tower Bridge, 我們就試了英國最聞名的Fish & Chip. 食完後就用London Pass 最後一次遊了St. Paul Cathedral, 是Diana結婚及葬禮的地方.

當日最後的節目就是去了黃生最想去的大英博物館, 由三點半行到八點半, 佢就睇得好開心, 我就累到常常要坐低. 但在那裏都謀殺了好多菲林. 然後, 我們就使用London Pass 的優惠在一間食日本菜的地方Wagamama, 食了一個幾好的晚餐.

30 May 2009

在倫敦的最後一日我們就去了劍橋及牛津, 在劍橋, 黃生扮書生買了一本書 “馬太福音的以賽亞預言” 我當然只買了一個好環保的劍橋環保袋.

在牛津, 我們遊了Christ Church, 是Harry Potter的場景. 同時, 我們在兩間院校都買了有這些院校標誌的衫, 都是因崇拜這些院校的心理.

回到市內只不過五點多, 所以行了最大的百貨公司Harrods, 一行到入去就看Diana和那法國人艾法耶斯手牽手, 很開心的銅像, 再一次記念Diana…

回到酒店附近, 食了一餐在倫敦最好食的晚餐, 但卻是印度餐…

31 May 2009

早上不用很早起床, 其實每一天都好遲起床, 大約八點半過後, 有時九時才起床(黃生通常比我早些起床, 是他Morning Call 我) 我們要搭二點三的飛機去羅馬, 去到五點九. 出到機場搭火車至市區大約七點多, 但找酒店卻找到八點多, 而且酒店比較遠, 行的路徑又是石春路, 行李比由香港至倫敦又重了, 所以拉行李都拉得好辛苦. 在酒店停頓了片刻就出外找嘢食, 但這裏比倫敦那裏靜好多, 所以找到一間意大利餐廳食飯, 都幾好的, 食物都好食, 黃生最喜歡的就是炒蜆意大利長通粉, 但我們等了差不多一小時才有嘢食, 食完都十一點多, 根多累到無心機食甜品就回酒店休息.

這一間酒店比倫敦那一間好好多, 房又大又有Lift, 但部Lift呢, 就慢到… 我們住四樓, 向下要1’17”, 向上要1’49”. 在Lift內可以做好多嘢…

1 Jun 2009

尋晚食完飯都夜，返到去又睇電視，雖然係意大利文，好似都好好睇，酒店既浴室比倫敦那間大，所以搞到好夜先訓，結果，成九點二先至醒，由於九點半後無早餐食，我地匆匆忙忙地梳洗，然後去食早餐—麵包。D包就認真唔得，比起當年巴黎那間，那間好得多。不過都求求其其食左。然後，上樓收拾，跟住就出去，今日的目的地係梵蒂岡。

我地行番去火車站，原來另一點有好多商鋪，熱鬧得多，地鐵也是，我們乘地鐵，然後再行去梵蒂岡，不過沿路都下著雨，好煩。去到廣場前，老婆忽然話好似無護照唔入得，唔係掛，我地無帶喎！本想轉去其他地方先，但來到又走，又大雨，一於排隊等，結果排左個幾鐘，終於衛入左去。但入到去仍然要排隊，有三條，我們估，人多一定係好地方，於是又排左成粒，先知，最長個條要7蚊歐羅，要行320級樓梯，因上梵蒂岡教堂既圓頂。一見到行樓梯，響英國未行夠咩！仲要pay cash去行，no la。於是轉去第二行，去睇歷代教宗的墓室，響教堂下面，當同佢地拜拜山啦！其中見到上任教宗的墓，仲有前任教宗，只在位一個月，我仲同黃太講解佢因發現某些貪污事件而傳聞被毒害。當然仲有相傳是彼得的墓，不過就攔住左，「天使與魔鬼」既佈置有點似。

行呀行，跟住上左教堂，好大好雄偉，也有好多人，好多雕刻，大部份都和聖經和教會歷史有關的。行到腳軟。於是響門外，食黃太尋日響飛機上無食既三文治。休息一會，再行過，今次仲去埋博物館，真係睇到好多教會歷史有關的文物。仲係用金造的呢！

行完，去左book shop，買左好多手信。聖本篤的牌仔，鼓勵人讀經和傳福音。然後響梵蒂岡郵局寄名信片。又去飲左杯4蚊的咖啡，呢D先係真咖啡，倫敦D真唔得。再行過中華民國大使館，難得見青天白日滿地紅，當然影下相。再行去附近一個大堡壘，然後就搭地鐵回酒店，出車站後，到一間比大家樂好的餐廳晚飯。都好ok。

2 Jun 2009

尋晚回家，繼續睇配在意大利文既電視，跟住睡，今次無咁遲起床，不過食完早餐後又上房執一會，所以都成十點幾先出發。今日天氣好，我們又行番去火車站，在站頭見到一個開巴士包遊船河，就買左，但隻船壞，無得遊。當我們行過其他旅遊公司，和sales，佢地見到我手持綠色巴士票，個個都話呢間公司唔好，但我們一於少理，想D sales緊係咁踩人啦！於是行去巴士站，找了一陣先見到綠巴士既站牌，其他旅遊巴既站頭都有幾架巴士，獨係呢間無。我地又明明在遠處見到綠巴駛過，但點解無車到。等左成個鐘，把幾火，向見到巴士既噴水池方向行去，途中遇上一個心懷不軌既人，最終避開左佢，跟手到巴士站，上在車，個導遊先話包括火車站、鬥獸場在內的五個站唔會停，我地即刻有被騙既感覺，即刻話要回水，佢話邊度買就邊度回。於是下車，又去番火車站，來來回回又花上起碼大半小時，最終發惡下退到錢，然後去搭另一架紅色巴士。不過，唔知乜野日，又係無去到鬥獸場，行個半小時的車程，半小時就到尾站，於是我地就想去許願泉，問導遊，佢話這個站就係，同埋話，響番呢度上車。

許願泉就真係好多人，同好多雀，我們都有用1仙定10仙既歐羅許願，許願的是鼻仔，我地今日帶佢出黎，但唔知幾時，佢個鼻染上啡色的東西，是樹皮、雀屎定朱古力，清理左好耐，（返去隔離），跟住我地行行行，然後就醫肚，響一間意式茶餐廳外面吃，黃太吃寬條麵，我吃雞脾茨仔，好味，雞脾是煎的，黃太吃了半隻，猛話，呢D先至係煮雞。

去完許願泉，再上巴士（開蓬巴士是全日通用的，車票20歐羅），經過番火車站，今次去遠好多，又經埋梵帝岡，去左鬥獸場，我們響度落車，響外面行行坐坐，無入去，因為人多，同埋收費覺唔抵。影相，跟住行去對面一個羅馬廢墟。都係響外圍行，然後到一個小教堂，比梵蒂岡更古老的教堂。

繼續搭巴士回程，我地好想找「天使與魔鬼」的其中一間教堂，外有噴水池，但找不到…因個個教堂都差不多。晚飯響一間意大利餐廳，塊牛排好好好好味。黃太叫了千層寬麵，總之一句—「正」。呢餐都50歐羅了。

3 Jun 2009

今日要起程去威尼斯，搭內陸機，點解，因為訂既時候，內陸機仲平過火車，所以揀了飛機，其實機票50歐羅，不過稅就40幾，所以兩個人都成180歐羅。我地搭一點幾既機，所以搭10:50既火車去機場。羅馬機場既出境大堂比入境好得多，第一日去到我幾驚那是生番之地，加上聽埋聽埋，所以個日都好緊張。今次就唔同，我地電子check-in後，就閒蕩一會，然後行去閘口，去到要delay半小時，唉！不過最終都係遲四個字，第一次搭意大利航空，感覺幾好，不過佢無機到香港，所以唔知真實情況。飛左約一小時，就到威尼斯既馬可郣羅機場。呢個機場大堂就靚得多，不過就好小飛機，有來自阿聯酋，仲有一架通常飛美國內陸既US Airways，想不到。從停機坪搭巴士到大樓，取行李後，就要查酒店點去，然後就食lunch。好簡單的沙律同Pizza。Information話搭巴士要行，搭的士20-25歐羅，所以就搭的士，係平治的士，結果搭左40歐羅~~~。不過，總算去到。我地住的是Holiday Inn四星架，價錢唔太貴的，1040港元一晚，平過羅馬那間，那間都要1,250港元一晚。英國那間就最平850港元一晚。

因為是Holiday Inn既緣故，設備都相對地好，床又好大，我地稍為休息後，就去火車站，因為未買威尼斯到米蘭的車票。行約十分鐘，就到巴士站，等了一會，上了巴士，發現唔駛入錢，想問司機佢又唔理你，黃太和一個中國遊客傾談，先知唔買飛都無人理，想買也不知響邊度買，就係咁，我地就搭左一程霸王車，去到火車站，買左車票，65歐羅一位，都唔係貴，跟住就行下街。原來陸地呢面既威尼斯無野好行，餐廳都唔多間，不過就有不少溫州人，不少中國、溫州餐館，我地都想食飯，但行行下見到有間雜貨鋪，中國人開的，想買水，1歐羅，但又想咁重，食完飯先買啦！於是再行多兩步，發現一間Supermarket，就係咁入左去shopping，買在好多野。其中買了兩罐橄欖油，響香港一樽要成一百蚊，呢度2.8歐羅，28蚊港紙，但因是玻璃樽，怕打爛，唔敢買，但行下見到有罐裝，3.9歐羅，所以買了兩罐1Lit，給我地既阿媽。

買完之後，去溫州菜館吃飯，是多日來的第一餐中國菜，黃太吃了久未吃過的炒蛋，呢一餐都好好味。回程又搭霸王巴，再行番酒店。回到酒店，book位去威尼斯（酒店有Shuttle bus，7歐羅一位來回），然後睇電視，意大利版一擲千金，好緊張，最終參賽那位只能取18,000歐羅，如果堅持可以有75,000歐羅既。睇完電視後，我地都sleep了。張床就認真大，我同黃太碌黎碌去，結果半夜斑仔飛左落街，仲要被我去廟所時踩左一腳，斑斑就夾響床同，床頭櫃之間，所以他們都拿拿臨去椅到同鼻仔一齊sleep，真唔好意思。

4 Jun 2009

Holiday Inn 即是Holiday Inn，早餐是自助餐，再唔駛捱麵包了。吃完早餐就出發去威尼斯，我地搭十點的車，今日陪我地去玩既係笨鼻鼻，帶佢就要帶大袋，都幾辛苦架。我們搭酒店Shuttle，去到威尼斯的碼頭，見到好多要買飛的counter，我想買那些one day全日通，又可搭船、又可搭巴士，但是老婆話，會從聖馬可廣場那裡行回來，而Shuttle司機也話行回來個幾鐘，所以就只買單程船票，6.5歐羅，即是約65-70港紙，坐八個字，去長洲成粒鐘都唔駛咁貴，香港交通幾平呢！由於隻船航行時發出「隆隆隆」的響聲，鼻鼻就以為搭緊「槓多拉船」（隆多拉船）。

到達聖馬可碼頭，我們在岸上行了一會，其實景色好靚，天氣又好。剛巧威尼斯有個甚麼甚麼展覽，為期半年的，我們去了台北的展館，講述台北人的城市生活，其中有一項自白，講述台灣女子申請到美國簽證時，受到歧視，但轉過到，當大陸女子到台灣所受的歧視更嚴重。然後我們都睇其他地方的展覽，但原來許多展覽館，都是由教堂改裝的。意大利真多教堂。

我們行過一條又一條的小橋，可能有條叫歎息橋。然後就入聖馬可大教堂，這個教堂雖然無梵蒂岡咁大，但氣氛莊嚴就遠勝前者，可能遊客也無咁多。我們行，然後就祈禱，在教堂有祈禱閣，然後燃點爉燭，這是記念死去的人而作的。剛好是六四，時間上又剛好是香港記念六四燭光晚會的時間，我們就在這裡記念八九六四二十週年了。約半小時，我們再行教堂，然後在教堂的bookshop買了許多野，其中有耶穌最後晚餐，比達文西那幅更生動的。

之後去行聖馬可廣場，好大，在不同的角落有不同的演奏，都是餐廳招人吃飯的技倆，好貴啊！所以我們都行左入去，在小街吃飯，都成20歐羅。然後，我們就行街了，當正想行的時候，有船家sell我地坐槓多拉船，包艇，80歐羅，哇！成千銀，唔好啦！澳門都係百二蚊港紙，返澳門坐罷了。寧願多D錢，買下野好過啦！太太買了她最想買的面譜，威尼斯是很聞名的，所以行完一間又一間，原來越入越精采，也越靚，最後買了兩個面譜（其中一個完全hand make，40歐羅），仲有hand make的武士（給鼻仔的），首飾等等。行行重行行，我們又回到碼頭，六點零七點，於是食飯，本來我好想找在海邊上的餐廳，找不到，只在另一家吃，晚餐14.5歐羅，一般不及羅馬雖後一晚那間。食完再行，先發覺那些在岸邊的餐廳，其實都唔平，不過有我好想吃的龍蝦，但已經飽飽了，所以無再吃。趁有點時間，去再找其它記念品，鼻鼻就成日話，威尼斯是大澳，其實他都未去過大澳。~~~

回到酒店，又要執執拾拾，明日要去米蘭，後日就返香港，行李也越來越多，所以要開多一個袋，裝鼻鼻佢地一班細路。

5 Jun 2009

今日起身，老婆話鼻鼻飛左落街，咁大張床，咁多位，都會….. ，起身吃過早餐，我地就收拾細軟，一拉二拖去巴士站，乘「霸王巴士」，到火車站，一路上威尼斯人好友善，叫我地企乜野位，當然到火車站我地就拿拿臨下車，總是有點會被人追車費的。

上在火車，我們就開始sleep，兩個半鐘的車程，經過許多耳熟的地方、博洛尼亞、布雷西亞、維琴察….. 對意甲有點了解，就知是甚麼。到米蘭車站，原來佢正裝修，有點失望，無行街街的地方，而車站出面又很大，其實酒店就好近，不過我地就行錯在，結果要用1蚊問路，買了一枝水。原來在另一面。這間Atlantic Hotel是四星，但就比唔上威尼斯那間，房就好大，我們照例搬出雪櫃的東西，放我們的水、汽水等等。放好一切，就出去吃飯，一間自助的快餐店，平平，然後搭地鐵，去米蘭大教堂廣場。本來我地想搭電車，有香港feel，單層的，但因唔識睇唔識講，都係搭地鐵，夠安全。途中有個女人想呃我1蚊，話教我搭地鐵，要報酬，我當然唔理你，我搭地鐵你都未出世啦，所以我搶回我的1蚊。

去到又下雨，行入教堂，好失望，好暗，但我地都有祈禱，最靚就係玻璃窗，彩色玻璃畫滿了聖經故事。行了一圈，想去博物館，但要收錢，無去。就此錯過了看達文西最後晚餐的真跡。然後行了一會名店街，始終意大利的東西比較貴，以波衫為例，同樣的波衫，英國36磅，意大利就要70歐羅，貴約200港元。

無買靚手袋，無買鞋，下雨無乜野行，斑仔一心想出黎「做世界」，結果無收穫。於是又去了另一間百貨公司，搭地鐵，去到好細，行了一會，黃太無買衫，因款式不合。反而我買了一件乾濕外套，最後，黃太買了一個kipling袋。剛好可以搞退稅，不過無帶護照，所以要call人補number。

晚飯於附近一間餐廳，都不錯，埋單貴左3蚊，原來刀叉每份個半，當茶錢。都幾得意。回酒店後，就搞上網，因為英航要網上check in，主要係我地唔想坐三人位，所以要早book雙人位，花了五蚊，終訂左。這裡上網是要錢的，雖然度度都有boardband ，但都要$$的。上房後，黃太洗澡，這酒店有按摩浴缸。所以她想來個按摩泡泡浴，結果搞到成個沖涼房都是泡泡。當然我又要出手啦。到我沖既時候，就無呢D情況出現了。

之後我就睇波，羅馬法國球星退休，請了施丹、迪金斯、林馬等等球星，非常好睇。太太就收拾行李，最後一晚就這樣過。原來我地都買有好多野，要三件寄艙。

6/6/2009

早餐於酒店，始終都是Holiday Inn好，吃完早餐，太太再打過電話去尋日的公司，報番個passport number給他們。然後就行去搭Shuttle bus 去機場。米蘭M機場都幾大，但大而無當，許多指示都無，要人自己找，英航個counter又遠，…去到先知唔可以寄三件，一人一件唔過23kg的行李，於是只好寄兩件。然後出境，出境響下一層，又無指示，好在先搞了退稅，如果唔係就煩死了。我地用晒D碎銀，買了午餐，三份pizza，原來汽水仲貴過咖啡。然後幾等機時，行過Gucci，其實都幾想買點東西，但無標價，D sales又好忙，所以就無買，最後太太就買左朱古力。

搭飛機，又回到希思路機場，呢個機場好煩，check野，好似驗屍咁驗，好鬼煩，差不多所有衫都要除晒咁滯。過左關，我地又行街街，都話英國波衫平，最終又買左件車仔主場，黃太好想我買的，又買了件曼聯給她哥哥。

行到差不多就上機，去程好多大陸團友，回程就香港團友多，買了許多許多野，霸晒D行李架咁滯，好在我地book 位book得早，有雙人坐，如果唔係，同其他人逼，好唔慣的。機上，我們看日落，一次又一次，因為唔同地方日落時間不同，明明太陽落了，唔夠十五分鐘又見佢再落過。

飛機餐照例不好吃，吃的時候總是遇上氣流，黃太無乜點食，我就快食。然後就除鞋休息。英航最令我滿意既地方，係來回程都能讓我響機上睡足六小時。航機7/6下午一點三返到香港。我地的旅程就這樣完結了。

天使與魔鬼

Wed, 20 May 2009 15:32:47 GMT

好睇，Dan Brown既野，實在寫得好。

睇這類片，首先要把自己放下，好好地娛樂輕鬆一下。

正！

中毒後復出

Tue, 06 Jan 2009 14:44:30 GMT

部電腦去年11月尾中毒後，經過一個月多，hea下hea下，終於恢復了。

同大家講定：「恭喜發財」。

哈哈！

尋寶記

Mon, 20 Oct 2008 15:30:59 GMT

太太轉工三個月，過左試用期，享受了醫療福利，帶協埋我都有，但右要我交張結婚証書既copy，本來我記得放響一個櫃筒到，但拉開又唔見，於是又想，好似我放在落保管箱度，於是去銀行開箱看一看，結局係找不到，去左邊呢？

如果唔見左，就大家鑊了。於是，趁今日放假，就找找啦！結果由上晝九點幾開始，逐個櫃筒，逐個櫃筒找，順便執下亂七八糟的「基地」【每個都咁亂】，於是執完一個又一個，執完細既執大既，執完櫃筒執書架，越執越亂，但找來找到也找不到。

去了那裡呢？雖然我D野係亂，但亂極都會知D野放響邊，無理由，於是響張成左小山既書桌尋找，「愚公移山」，連老婆話個廢電話都掉埋，真的不見了。

真.............大鑊，真.....................大鑊，呢鋪認真大大鑊。

於是，再拉用原本放結婚証書既櫃筒，成個抽出，........EEEEEEEEEEEEE，氣死我了。竟然，攝左響櫃筒底，即係話，本來找五分鐘的東西，搵足成十個鐘，一個美好的假期，就呆左響企一日。搞到去唔到書展.......

不過，都好，尋回張結婚証書，拿拿臨Scan左落電腦到，明早送番佢入保管箱，咁就唔駛再怕唔見，要尋寶了。

出人意外的平安

Tue, 14 Oct 2008 06:30:53 GMT

感謝主，的確要透過禱告祈求和感謝，將你所要的告訴上帝。

在講台上分享到太太無書用，經歷禱告大能，有很多弟兄姊妹願意幫助。

最後在中大圖書館找到那本書。哈哈，我們可慳回成千銀了。

為此獻上感恩。